KONTAKT / CONTACT

13. Dezember 2024: Prix du Bénévolat 2024

Den 13. Dezember krut d’Nicole Backes-Walesch de „Prix du Bénévolat“ vun der Gemeng Beetebuerg iwwerreecht. Bal 12 Joer ass et hir, dass hire Mann en Hiereschlag hat. Domat huet sech net nëmme säi Liewen, mee dat vun der ganzer Famill, an – als Partnerin a Mamm – och dat vum Nicole fundamental verännert. An engem Moment, an deem d’Frustratioun duerch dem Nico seng Krankheet net méi auszehale war, huet d’Nicole Hëllef bei der Blëtz a.s.b.l. gefrot.

Vun deem Moment un, hu si an den Nico reegelméisseg un de Porte ouverte vu Blëtz deelgeholl. Den Austausch mat anere Betraffenen an anere betraffene Familljen huet béide gutt gedoen. Esou, dass d’Nicole decidéiert huet, sech benevole anzesetzen a Mënschen ze hëllefen, déi duerch en Hiereschlag mat änlechen Defie konfrontéiert si wéi si. Ëmmerhin erleiden zu Lëtzebuerg all Dag 4 Persounen en Hiereschlag.

Säit 2017 ass d’Nicole Backes-Walesch Tresorière vu Blëtz. An hirer Funktioun als Comitésmember hëlt si säitdeem u sëllegen Aktivitéiten, Aktiounen a Scheckiwwerreechungen deel. Wat si besonnesch auszeechent, ass dass d’Nicole sech am Virfeld ëmmer bis an dat klengsten Detail informéiert a bei absolutt all Evenement net nëmmen en „acte de presence” fir de Blëtz mécht, mee ausnamslos bis zum Schluss bleift.

E besonneschen Highlight vun hirem Benevolat bei der Blëtz a.s.b.l. war d’Scheckiwwerreechung Enn November zu Beefort. Hei duerft d’Nicole net nëmmen de Scheck entgéint huelen, mee och de Match tëscht de Beaufort Knights an Haskey Hasselt mat engem „puck drop“ offiziell erëffnen. Et versteet sech vum selwen, dass d’Nicole zanterhier Eishockey-Fan ass a kee Match méi verpasse wëll.

Am Numm vun der ganzer Equipe vu Blëtz a.s.b.l. soe mir dem Nicole vu ganzem Häerze Merci fir säi beispilllosen Engagement an de leschten 8 Joer, an hoffen, och déi nächst Joren, weiderhin esou schéi mat him zesumme schaffen ze kënnen. Och der Gemeng Beetebuerg wëlle mir villmools Merci soen, fir hir Ënnerstëtzung iwwert déi lescht Joren.

Fotoen © Alain Piron